Deputetët e dy partive opozitare PD dhe LSI i kanë dhënë fund bojkotit parlamentar.
Deputetët opozitarë kanë shkuar sot në prezantimin e progres raportit të KE-së, nga ambasadorja Romana Vlahutin.
Deputi demokrat Genc Pollo i ka uruar suksese kryeministrit Rama në vizitën e tij zyrtare në Gjermani, ku Ramës i është “caktuar” detyra e bindjes së skeptikëve në qeverinë Merkel.
“Opozita po bën përpjekje për të bindur vendet skeptike. Shpresoj që Rama të ketë sukses sot në Gjermani. Të shmangen sulmet ndaj deputetëve evropianë. Jo sulme për merita e fajtorë.”-ka thënë Pollo, kryetari i Komisionit parlamentar i Integrimit.
Nga ana tjetër ambasadorja e BE-së në Tiranë, Romana Vlahutin, ka bërë thirrje për vullnet politik të politikanëve dhe konsensus konkret.
“Reformat të ruhen e të thellohen. Të shohim çdo të mendojnë shtetet anëtare në qershor për negociatat. Duhet konsensus konkret në veprime dhe jo vetëm në retorikë. Vullneti politik është thelbësor. Informacionet vijnë nga dhjetëra burime të ndryshme, në fund, raporti duhet të miratohet nga gjithë kolegji, duhet të marrë një vendim njëzëri dhe kjo është ajo që ndodhi me Shqipërinë kur u hap drita e gjelbër.”-ka thënë Vlahutin.
(F.G/Faxweb.al)
Discussion about this post