‘’Me shkelje procedure dhe me dhunë,Edi Rama nuk lejoi edhe dje votën, gjatë zgjedhjeve për urdhërin e psikologut’’, kjo ka qenë akuza e ngritur sot nga Partia Demokratike. Sipas saj Rama me Klosin vendosën në komisionin e votimit njerëz të besuar të tyre.
‘’Edi Rama nuk e humbi rastin për të treguar edhe dje modelin e tij për zgjedhjet, manipulimin, presionin dhe kapjen e votës, me farsën e madhe të Urdhërit të Psikologut, duke sjellë në krye njeriun e tij të besuar, Treska.
Shkeljet që u bënë dje në votim, janë tipike të Edi Ramës.
Mbledhja e psikologëve që punojnë në administratë me urdhër nga shefat, detyrimi i tyre për të votuar kandidaturën e qeverisë, kërcënimi me vendin e punës, presioni përmes ministrit Klosi, prishja e garës, moslënia kohë për kandidatët e tjerë, organizimi i autobuzëve nga rrethet, mungesa e kuorumit të nevojshëm.
Komisioni i votimit ishte i zgjedhur nga ministria e Klosit, numëruesit nga ministria e Klosit, dhe pjesmarrja në votim ishte më pak se 50 përqind, në kundërshtim me ligjin.
Rama e kapi dhe këtë institucion, që duhej të ishte i pavarur, profesion i lirë.
Interesi i Ramës me manipulimin e këtyre zgjedhjeve, janë zgjedhjet që po vijnë, pasi dihet se psikologët e shkollave janë në kontakt me maturantët që kanë fituar të drejtën e votës.
Kjo farsë, tregoi edhe një herë se Edi Rama nuk e lejon votën e lirë, ai kërkon të kapë zgjedhjet ku të mundet, të mbajë pushtetin me çdo kusht’’, thuhet më tej në deklaratë. (E.K/SHUPLAKA)
Discussion about this post