Partia për Drejtësi Integrim dhe Unitet ka reaguar pas mos arritjes deri tani të një marrëveshje politike mes palëve edhe pas ndërhyrjes së Hoyt Brian Yee.
Pjesë nga deklarata e PDIU:
Mungesa e marrëveshjes rrezikon të thellojë krizën. Të rimerret në shqyrtim paketa McAllister. Partitë të marrin përgjegjësitë para qytetarëve.
Mos ta lëmë vendin peng të mllefeve të liderëve. Thirrje palëve të kthehen në tryezën e bisedimeve.
Duhet një marrëveshje për zgjidhjen e krizës politike në vend. Duhet një pakt kombëtar midis pozitës dhe opozitës. Të ndërmarrim po ashtu një reformë elektorale.
Më herët ka reaguar Partia Demokratike. Sipas opozitës Z. Hoyt Yee i paraqiti drejtuesve të opozitës një propozim të integruar për zgjidhjen e krizës politike në Shqipëri.
“Ky propozim i integruar përfshinte (me shkrim) propozimin McAllister dhe planin e tij 15 pikësh, minus zgjedhjen e Presidentit të Republikës që tashmë ka ndodhur, plus propozimin e detajuar me 7 pika të paraqitur nga Kryeministri Rama gjatë takimit të tij me kreun e opozitës Basha më 3 maj 2017.”, shkruhet në deklaratë.
Pas Partisë Demokratike për negociatat politike të orëve të fundit ka reaguar edhe Partia Socialiste.
“Mbështesim fuqimisht këtë përpjekje të fundit. Për Partinë Socialiste, rezultat pozitiv do të thotë garanci si asnjëherë për opozitën në zgjedhjet e 18 qershorit, në respekt të Kushtetutës, ligjit, interesit të qytetarëve shqiptarë dhe sugjerimeve dashamirëse të partnerëve tanë ndërkombëtarë”,-thuhet në njoftimin për mediat.
(M.D/Shuplaka)
