Pedagogia e Oxfordit, Ina Jasini thotë se është shumë e vështirë që në Shqipëri të sigurohet një arsim publik falas.
Sipas saj, në vendin tonë ka pjesëmarrje të madhe studentësh. Ajo tha se që arsimi falas të jetë i përballueshëm vendi duhet të ketë një ekonomi të mirë.
“Në një shoqëri ideale, me një ekonomi të mirë padiskutim që mund ta përballonte, mund të marrim rastin e Finlandës psh., por në fazën aktuale një ristrukturim dhe një reformë e arsimit kërkon deri diku një pagesë të bëhet. Unë e kuptoj reagimin e studentëve ndaj pagesës që ishte vendosur për çdo provim, por nga ana tjetër i kushton sistemit që të krijojë mundësinë që të ta japësh si provim për herë të dytë. Besoj se do të jetë shumë e vështirë për të siguruar një arsim publik falas me këtë pjesëmarrje kaq të madhe që kemi në Universitet e Tiranës dhe rrethe”, tha ajo në Ora News.
Sa i përket protestës së studentëve, ajo e shikon si një nevojë për reflektim nga lidershipi shqiptar.
“Ajo që unë kam vërejtur është sesi pjesa më dinamike e shoqërisë ka treguar atë sensibilitet dhe ndërgjegjësim ndaj të drejtave të tyre. Kur vjen nga larg ajo që shpesh herë vëren është gjendja e apatisë së shoqërisë shqiptare. Mbase kjo protestë ka treguar për mua që ka nevojë për një thirrje dhe për një reflektim nga lidershipi shqiptar”, u shpreh Jasini. (B.H.Faxweb)
Discussion about this post