Studentët vijojnë protestën e tyre maratonë, ndërsa prë të disatën ditë radhazi ata qëndrojnë gjatë të gjithë natës në sheshin para Kryeministrisë.
I ftuar në emisionin “Natë me Xhaxhiun”, për të komentuar situatën aktuale dhe protestën studentore, është pedagogu Petrit Vargu, i cili shprehet i bindur se studentët do të fitojnë, ndonëse qeveria po përpiqet të fitojë kohë.
“Studentët do të fitojnë. Gjëja e vetme me të cilën mund të luajë pushteti, është koha. Ata po përpiqen të fitojnë kohë, por studentët do të fitojnë”, – tha ai.
Më tej ai u ndal tek prononcimet e Kryeministrit, lidhur me çështjen në fjalë, ndërsa tha se po mundohet të viktimizohet, për të mos humbur më shumë elektorat.
“Ai thotë unë jam me studentët. Me çfarë studentësh je ti? Po atë shefin që procedoi 25 protestuesit mes tyre studentë e profesorë? Po atë drejtorin që pushoi infermierin?
Ai merret me dinakëri. Është njeri i zgjuar po mundohet që të mbajë elektoratin duke u hequr si viktimë, pasi e sheh që po e humb”, – tha Vargu.
Më tej ai u shpreh se nëse Rama do të donte, tavanin do ta ulte e kështu rektorët nuk do të kishin se çfarë të bënin.
(B.B/ Faxweb.al)
