I arrestuari i pak ditëve më parë mbi grabitjen e 3.2 milionë dollarëve në Rinas, Admir Çerpja, rrëfehet mbi krimin dhe zbulon edhe emrat e autorëve të tjerë.
Sipas raportimeve nga policia, Çerpja është penduar dhe ka bashkëpunuar me policinë dhe prokurorinë dhe për më tepër, ka qenë ai që ka zbuluar vendin ku ishin fshehur paratë, në oborrin e shtëpisë së tij në Bathore.
ABC News raporton se Çerpja, ka treguar edhe emrat e personave me të cilët ka bashkëpunuar, si në vjedhjen e dhjetorit të 2015 ashtu edhe atë të datës 9 shkurt të këtij viti.
Sakaq, Prokuroria ka dorëzuar fletëkërkesën për arrestin dhe caktimin e masës së sigurisë së të arrestuart në Gjykatë.
Mësohet se bashkë me paratë e zbuluara nga oborri i shtëpisë së Çerpjas, shuma e zbuluar deri më tani shkon vetëm deri në 400 mijë dollarë amerikanë. Pjesa tjetër e parave ende nuk dihet se ku janë. Edhe Çerpja ashtu si Fatjon Xhyli, Ditjon Memlika dhe Neim Avdulaj, ka deklaruar se një pjesë të parave i ka humbur në lojëra fati.
Ndërkohë, i arrestuari tjetër Neim Avdulaj ka rrëfyer se bashkë me Admir Muratajn, i cili ende është në kërkim nga policia, kanë rënë dakort se nuk do të tregonin asgjë nëse do të kapeshin. Premtim ky i cili nuk është mbajtur nga ana e tij dhe të arrestuarve të tjerë. Vetëm Ernest Kupa ende nuk e ka pranuar përfshirjen e tij në grabitje. (D.D/Shuplaka)
