Të gjithë përfituesit e pensionit social duhet që me fillim vitin të rideklarojnë sërish të ardhurat e tyre me qëllim rilidhjen e pagesës. Kjo procedurë kryhet për të verifikuar nëse të ardhurat e këtij individi kanë ndryshuar ose jo.
Përfaqësues të Sigurimeve Shoqërore janë shprehur se për përfitimin e tij, nuk është i nevojshëm dorëzimi i dokumenteve, por vetëm deklarata (kur rasti është i përsëritur). “Kjo përveç rasteve kur ka ndryshime të gjendjes financiare: mund të ketë hapur një biznes, mund të jetë aksioner në një aktivitet ose mund të ketë ndonjë të ardhur tjetër, si për shembull pasuri të paluajtshme të lëshuar me qira dhe merr të ardhura”,- shpjegojnë specialistët.
“Përfituesit mjafton që në paraqitjen e tyre pranë agjencive lokale të sigurimeve shoqërore, të kenë me vete kartën e identitetit dhe të deklarojnë që kanë të njëjtat të ardhura si herën e mëparashme”, bën me dije ndër të tjera “GSH”. Instituti i Sigurimeve Shoqërore shpjegon se janë rreth 1800 persona që përfitojnë pension social.
Sipas ligjit, pensioni social është një përfitim që i jepet çdo shtetasi shqiptar që ka mbushur moshën 70 vjeç dhe është me qëndrim të përhershëm në Shqipëri, të paktën për pesë vitet e fundit.
Për të qenë përfitues, nuk duhet të plotësohen kushtet për asnjë lloj pensioni nga skema e detyrueshme e sigurimeve shoqërore (pension të plotë pleqërie, pension të reduktuar pleqërie, pension invaliditeti) dhe s’duhet të ketë asnjë lloj të ardhure.
Mund të përfitojnë pension social edhe ata persona që kanë disa të ardhura, të cilat janë më të ulta se të ardhurat që jep pensioni social. (XH.A/SHUPLAKA)
