Pepe i thotë lamtumirë Realit, pse do të mbahet mend në “Bernabeu”

Ai do të mbahet mend padyshim si një nga lojtarët më luftarakë që Reali i Mdridit ka pasur në përbërjen e tij. I kudogjendur, gati për ofendime, por edhe për ndërhyrje të forta.

Do të duhej një libër i tërë për të numëruar ofendimet, që tifozët kundërshtarë të mbrojtësit Pepe kanë adresuar ndaj futbollistit portugez në La Liga.

Tashmë veterani i prapavijës së “galaktikëve” ka vendosur të largohet nga Real Madrid, në një transfertë pa kosto këtë verë, pas plot një dekade me të njëjtën fanellë. 34-vjeçari numëron 334 ndeshje me skuadrën “merengues”, e gjatë kësaj kohe ka ndihmuar Realin të marrë 3 tituj kampionë në Spanjë, si dhe 3 trofe në Champions League.

Pepe zyrtarizoi largimin nga “Los Blancos” në mënyrën më të mirë, pas një triumfi fantastik në Kardif ndaj Juventusit. Portugezi humbi në ndeshjet e fundit betejën me Varane dhe Nacho për të qëndruar në linjën e mbrojtjes, e tani ndaj tij kanë vërshuar shumë oferta.

Milan, PSG, por mbi të gjitha klubet angleze kërkojnë shërbimet e mbrojtësit, që mbetet popullor mes tifozëve të “Los Blancos”. (E.K/SHUPLAKA)