Rasti i 14-vjeçares Anika C. është rasti i dytë i shënuar në Shqipëri lidhur me lojën “Balena Blu” që fatmirësisht është zbuluar duke shmangur fundin fatal. Në një intervistë për “Dritare.net”, 14-vjeçarja nga fshati i Gjirokastrës dhe nëna e saj kanë folur konkretisht për këtë rast.
Fillimisht nëna e adoleshentes, Alketa C. ka treguar se nuk ishte në dijeni të ngjarjes. Ajo detyrohej ta dërgonte vajzën në shkollë në Gjirokastër për shkak të mungesës të një institucioni arsimor në fshat. Pavarësisht shenjave që i kishin vërejtur, e bija 14-vjeçare i gënjente duke u thënë se ishte vrarë. Nëna e të miturës shpjegon se gjithçka e mori vesh nga mësuesja, pasi nuk kishte aspak dijeni për lojën e rrezikshme “Balena Blu”.
“Ishte mësuesja ajo që komunikoi me ne, unë nuk dija gjë për këtë Balenën Blu. Kur mbaronte shkolla vajza takonte Anën dhe në atë kohë i bënte ato që i kërkonte Balena. Balena i kërkonte të gjuante veten me shpulla, të ikte nga ora e mësimit, mos të shkonte në shkollë, të merrte 4, të lagte shoqet me ujë, të zihej me shokët, të shkruante një letër e të kërcënonte njerëzit., të mos hante bukë kur vinte në shtëpi, të çohej në orën 4 të mëngjesit, të rrinte pa gjumë, të hante vetëm mish. Vajza ime i ka bërë të gjitha këto.
Ajo ka qenë një fëmijë i mbarë gjithmonë, e hedhur, shumë e zgjuar. Nuk e di pse vajza i bëri këto gjëra, e ka detyruar Ana ta bëjë një gjë të tillë. Nuk e di sesi vajza arriti në këtë gjendje. Unë kam dhe një vajzë tjetër, por Anika nuk fliste fare as me të.”, ka rrëfyer e ëma.
Ndërsa vetë Anika C. 14-vjeçarja që përbën rastin e dytë në Shqipëri, ka treguar se si nisi e gjitha. Si një vajzë 17-vjeçare me emrin Ana, i prezantoi lojën, i jepte informacion mbi të, e deri tek kërcënimet e saj se nëse e fshinte aplikacionin apo nuk e luante lojën, do t’i bënte keq familjes së saj:
“Informacionet për Balenën Blu unë i mësova nga lajmet, por ishte pasi unë e kisha nisur të luaja. Por, është shumë e vështirë të dalësh nga ajo lojë. Ti e humbet veten dhe kalon në një gjendje depresioni, për të shkuar në fund që ti bën vetëvrasje, rrëfen Anika për dritare.net.
Ditën e parë mu kërkua nga Balena, të dhënat e mija, emër, mbiemër, mosha, foto, jo vetëm timen, por edhe të prindërve. Madje fillonte të kërcënonte që nëse e fshija lojën nga telefoni, do t’i bënte keq familjes time, do të më vriste prindërit e motrën. Duhet të vërtetoja që unë po e bëja lojën, prandaj duhet të bëja video ose foto. Veprimet i bëja me Anën prezente, ajo nuk më thoshte gjë, thjesht më shikonte e më stimulonte t’i bëja gjërat.
Në ditën e dytë duhet të gjuaja veten me shpulla dhe të dërgoja videon që e kisha bërë. Unë flisja në anglisht me të. Në lajme dëgjova më pas që është një djalë 21-vjeçar që quhet Aleksandër, por është kapur e futur në burg. Ndërkohë janë shokët e tij që e përdorin këtë lojë dhe policia e ka të vështirë t’i kapë ata.”, ka treguar Anika.
14-vjeçarja ka rrëfyer se ndihej sikur e gjithë bota e urrente, sikur nuk e donte, ishte mbyllur në vetvete dhe madje edhe balena i kërkonte që të rrinte në një vend të errët dhe vetëm.
(XH.A/SHUPLAKA)
