Banorët e prekur nga tërmeti kërkojnë ndihmë nga shteti që t’iu sigurojë strehim, por nuk ju mungon as solidariteti për ata që humbën njerëz në Durrës dhe Thumanë. Momentalisht qytetarët, shtëpitë e të cilëve janë prishur, janë strehuar në kampet e ngritura nga qeveria, por ata kërkojnë diçka më të sigurtë.
Një qytetare foli për mikrofonin e Faxnews nga kampi në Laç, e cila u shpreh se shtëpia është shkatërruar dhe brenda saj nuk banohet dot.
“Unë jam e sëmurë. Mirë na kanë trajtuar deri tani, por jam me dhimbje koke prej 2 ditësh, jam me ilaçe. S’jemi mirë prej tërmetit. Shtëpitë i kemi copë-copë. Shtetit i kërkojmë strehim për momentin, asgjë tjetër. Në hotele nuk shkoj sepse dua të rri afër spitalit se jam e sëmurë, në Lezhë nuk shkoj”, tha ajo.
Ndërkohë, një banore tjetër, po gjatë një prononcimi për Faxnews, tregoi sesi brenda kampit nuk ka marrë akoma asnjë ndihmë. Ajo shtoi se ndihet e frikësuar.
“Rrimë për strehim këtu. Sot kam ardhur. Është e vështirë, nuk kemi marrë as ushqim, as dyshek. Shtëpia jonë është e pabanueshme, kemi frikë të rrimë brenda. Kemi shumë frikë. Jam e vetme”, deklaroi e moshuara.
Ndërsa një qytetare tjetër kërkon ndihma për të afërmit e saj, por nga ana tjetër nuk lë pa përmendur as viktimat e Thumanës dhe të Durrësit. Duke u solidarizuar me viktimat dhe me banorët që humbën të afërmit e tyre dhe shtëpitë, qytetarja tha për Faxnews se ishte gati të jepte çdo ndihmë, madje edhe rrobat e veshura, vetëm që ajo tragjedi të mos ndodhte.
“Unë vetë jam stabilizuar, por kam këta që akoma nuk kanë zënë vend. I kam njerëz të mi dhe dua të stabilizohen. Ajo atje ka fëmijën të vogël, me gji, dhe nuk lëviz dot. U janë shembur shtëpitë. Po kërkojmë një dyshek e dt batanija sat ë mbulohet më fëmijën. Ne duam shtëpi, nuk duam jorganë e batanije. Na kanë dhënë mëngjes e drekë e darkë, mjaft janë munduar se ka njerëz që kanë vdekur, janë 6-7 vetë të një shtëpie. Ka shumë-shumë më keq. Për shpirt unë i heq rrobat që kam veshur vetë dhe jua jap atyre në Thumanë e në Durrës. Por më vjen keq edhe për këta që janë këtu, atë që ka fëmijën me gji kam qejf ta ndihmoj. Edhe atë tjetrën se e burrin me paterica në shtëpi sepse është përplasur me motor dhe nuk i ecën dot”, tha banorja.
(M. I./ Faxweb.al)
Discussion about this post