Ish-ministri i Shëndetësisë, Ilir Beqaj, do të gjykohet i veçuar nga 8 të bashkëpandehurit e tij për akuzën e ngritur ndaj tij në dosjen “Sterilizimi”.
Çështja ndaj ish-ministrit u veçua pasi gjykata pranoi kërkesën e të bashkëpandehurve për gjykim të shkurtuar. I vetmi që nuk kërkoi këtë formë gjykimi, që në rast fajësie i ul të pandehurit 1/3 e dënimit, ishte ish-ministri Beqaj, që edhe në seancën e së mërkurës këmbënguli se SPAK nuk i kishte komunikuar zyrtarisht akuzën e re, atë të “vjedhjes duke shpërdoruar detyrën”, në formën e grupit të strukturuar kriminal. “Në akt-akuzën që kam unë, shënohet vepra penale ‘shpërdorim detyre’. Këtu nuk shënohet askund ‘vjedhja’.
“Nuk ka një shifër për vjedhjen në gjithë këtë material”, tha Beqaj. Në të njëjtën linjë arsyetimi, edhe avokati i Beqajt i tha gjykatës se nuk ishte i qartë për cilën akuzë duhet të mbronte klientin e tij për akuzën në të cilën dosja shkoi në gjykim, atë të “shpërdorimit të detyrës”.
Veçimi i dosjes ndau në dy gjykime të ndryshme edhe ish-zv.ministrin e Shëndetësisë, Klodian Rrjepaj dhe biznesmenin, Ilir Rrapaj, të akuzuar si anëtarë të grupit kriminal të ish-ministrit. Akuza ndaj të treve u rikualifikua gjatë shqyrtimit paraprak, me sugjerim të gjykatës, pasi më herët SPAK kishte kërkuar gjykimin e tyre për “shpërdorim të detyrës”, e njëjta akuzë për të cilën po gjykohen gjashtë të pandehurit e tjerë.
Në seancën e radhës ndaj të pandehurve me gjyq të shkurtuar, Klodian Rjepaj, Ilir Rrapaj, Matilda Serjani, Samir Kadiu, Petraq Mersini, Arben Gjata, Genci Byrazeri dhe Naile Ajazi, e caktuar më 11 qershor, SPAK pritet të paraqesë pretencën.
Ndërsa çështja penale ndaj Beqajt do të rihidhet në short. Sipas SPAK, veprat penale nga të akuzuarit e dy çështjeve janë konsumuar gjatë lidhjes së kontratës 100 milionë euro të Sterilizimit. Ish-ministri Beqaj dyshohet të ketë nënshkruar kontratë në kundërshtim me ligjin, bazuar në të dhëna të pavërteta në studimin e fizibilitetit dhe pa shmangur konfliktin e interesit me biznesmenin Ilir Rrapaj, fitues i koncesionit.
