Karnavalet kanë pushtuar për të 10-tin vit qendrën e qytetit të Korçës me personazhe dhe veshje nga më të ndryshmet ndërsa pjesë e festivalit ka qenë edhe “Birra Korça”.
Për të disatin vit rradhazi kllounët, shpatarët, kërcimtarët dhe personazhe të jetës së përrallave dhe asaj reale kanë prezantuar numrat e tyre duke entuziazmuar dhe gjallëruar gjithë qytetarët.
Festa ka shënuar edhe startin e sezonit turistik për këtë verë që pritet të jetë e mbushur me aktivitete nga më të ndryshmet dhe që si çdo vit kulmon me festën e “Birra Korça”. Parada shumëngjyrëshe këtë vit ka sjellë 28 grupe të cilat pasi marshuan në bulevardet e Korçës të shoqëruar për çdo grup pjesëmarrës me nga një fabul u përqendruan në sheshin para katedrales ku kanë ofruar performancat e tyre.
Gjithashtu, në këtë festival karnaval nuk kanë munguar muzika klasike, kërcimet, ballot me maska apo dhe këngët tradicionale e romantike të serenatës korçare.
Mijëra spektatorë kanë mbushur dy anët e pedonales së qytetit ku pjesa më e madhe e tyre kanë qenë të veshur me maska e kostume të larmishme plot ngjyra. Festat në Korçë pritet të arrijnë kulmin me festën e birrës, ku dhe pritet të arrihet kulmi i turistëve.
Karnavalet kanë nisur të festohen në qytetin e Korçës para viteve ’40, periudhë kur jeta kulturore në këtë qytet ka qenë e larmishme. Megjithëse një festë pagane, karnavalet më vonë festoheshin ditën e Ndjesave në muajin shkurt. (D.D/Shuplaka)
