A ka përçarje mes PD-së dhe LSI-së sa i përket ligjit të magjistratëve? Sipas Luan Ramës, jo, ai në emrin e LSI-së ka propozuar sot që deputetët të mos kenë pushime deri në zgjidhjen e ngërçit të reformës në drejtësi.
Rama tha se në kontaktet që ai ka pasur me PD-në dhe ata janë të hapur për zgjidhjen e ngërçit në mënyrë që drejtësia të mos ngelet në dorën e njerëzve të bandave të krimit.
“Nga sot, deri sa të zgjidhet problemi i Gjykatës Kushtetuese dhe Gjykatës së Lartë të mos fillojë pushimet Kuvendi. Deri sa të bëhet funksionimi normal i sistemi të drejtësisë.
Nuk mund të vazhdojmë si në një situatë normale, nuk është problemi i regjistrimit të Magjistratëve, por funksionimi i Gjykatës Kushtetuese, pa të cilën çdo pushtet tjetër duhet të reshtë së ekzistuar”, u shpreh Luan Rama, duke kërkuar ndërprerjen e seancës se Kuvendit.
Në përgjigje të kërkesës së tij, kreu i Kuvendit, Gramoz Ruçi u shpreh se “Seanca do të vazhdojë normalisht në pritje të një përgjigjeje të kreut të PD. Pas kësaj do të thërras të tre drejtuesit për të kërkuar dialogun që ju kërkuat”, u shpreh Gramoz Ruçi.
”S’ka radhë për propozimet, mjafton të jenë funksionale. Kemi kërkuar prej kohësh që dialogu të jetë serioz dhe i vazhdueshëm. Jemi përballë një kolapsi institucional, është emergjencë kombëtare. Ligjin do e bëjnë bandat. Jemi pjesë e së njëjtës opozitë, misioni është kthimi në normalitet e kushtetueshmërie të kësaj reforme.
Reforma në Drejtësi është një sfidë kombëtare dhe ka nevojë për angazhimin e të gjitha forcave politike. Propozimet janë racionale, e duhet të gjejnë mbështetje.
Në të gjitha kontaktet që kam pasur edhe PD mbetet e gatshme për bashkëpunim. Jemi përballë një kolapsi institucional do të bllokohen gjykatat. S’besoj se çështjet e rëndësishme mund të zgjidhen me njëanshmëri”, -tha Luan Rama në daljen e tij për mediat.
Ligji në fjalë kërkon shumicë të cilësuar me 84 vota, të cilën Partia Socialiste nuk e arrin dot pa ish-aleaten e saj, LSI-në, tashmë në opozitë.
Përveç 74 kartonave të saj, PS-ja ka të sigurtë votën e Tom Doshit, 3 votat e PDIU-së dhe atë të Robert Bitrit, që zyrtarizoi largimin nga LSI-ja duke u regjistruar si i pavarur, gjë që çon mazhorancën në kuotën e 79 votave.
(E.K/FAXWEB.AL)
