Vetëm pak ditë pasi mbeti i vrarë në një sulm me armë në Gjermani, Keidi Pasha, djali i efektivit të policisë rrugore në Burrël , Arben Pasha, është përcjellë për në banesën e fundit.
Ceremonia mortore u mbajt në vendlindjen e tij në Burrel ditën e hënë më 18 Gusht. 20-vjeçari humbi jetën pas një konflikti me të shtëna me armë zjarri në Wolfsburg të Gjermanisë mbrëmjen e 13 Gushtit.
Nga burime hetimore u mësua se Keidi Pasha ka qenë së bashku me disa persona të tjerë në një lokal, ku dhe nisi konflikti. Sherri më pas u zhvendos në anën tjetër të rrugës.
Keidi dhe një shqiptar tjetër nga Burreli kanë qenë në trotuar kur një makinë ndaloi përpara tyre dhe hapi zjarr.
Të dy mbetën të plagosur rëndë, por fatkeqësisht 20-vjeçari ndërroi jetë teksa po i jepej ndihma e shpejtë.
Kurse shqiptari i dytë mësohet se është jashtë rrezikut për jetën dhe ka hezituar që të flasë për autoritetet gjermane.
Por, burime policore për tvklan.al kanë thënë se nga shkëmbimi i informacioneve me palën gjermane, është mësuar që vrasësi i Keidi Pashës të jetë një shqiptar nga Vlora.
Ai u identifikua pas këqyrjes së pamjeve nga kamerat e sigurisë në vendngjarje. Shkaqet e ngjarjes së rëndë janë të paqarta.
Hetuesit gjermanë po vijojnë punën për të zbardhur motivet.
Discussion about this post