Përfaqësuesit e CDU-CSU takim dhe me Bogdanin: Diskutuam ç’ka duhet të bëjmë për të bërë realitet endrrën e një Shqipërie më të mirë

Pas takimit me deputeten në largim  të PD-së Jozefina Topalli, përfasqësuesit e CDU-CSU-së në Gjermani kanë pasur një takim dhe me Gerti Bogdanin.

Deputeti demokrat vlerëson lart mbështetjen e Gjermanisë ndaj vendit tonë dhe shprehet se bashkëpunimi do të vijojë edhe pas zgjedhjeve.

“Takim me Dr. Joachim Pfieffer anëtar i Bundestagut Gjerman, zëdhënes i CDU/CSU per Energjinë dhe Ekonominë.

…Një mik i vjetër, jo vetëm personal, por edhe i Shqipërisë! Diskutuam gjatë për Shqiperinë post-zgjedhore, atë ç’ka duhet të bëjmë për të bërë realitet endrrën e një Shqipërie më të mirë edhe kur duket e vështirë! …miqësia vazhdon!”, shkruan Bogdani bashkëngjitur fotos.

Ndërkohë që Topalli pas takimit të saj me përfaqësuesit gjermanë tha se u shprehu atyre shqetësimin e thellë që vendi mbeti pa opozitë.

”Me Dr. Joachim Pfieffer ( zëdhënës i grupit parlamentar CDU/CSU në Bundestag për ekonominë dhe energjinë dhe Elke Kreiser. Ata ishin njohur me rezultatin rrënues të Opozitës më 25 qershor. Bashkëbiseduam për zhvillimet e fundit politike.

I njoha ata me kërcënimin që shfaqet pas rreth gati 3 dekadash, kur një kryetar partie (i vetëshpallur i vetëngrirë), nuk lëshon karrigen, edhe pasi ka rrënuar partinë qe drejtoi, me 230 mijë vota me pak , ose me një rënie rreth 35% më të thellë nga humbja e fundit, në kushtet e qeverisë më të keqe të Edi Ramës.

Unë shpreha shqetësimin e thellë për rrezikun e mbetjes së vendit edhe pa një opozitë të vërtetë, si gjeja më kërcënuese për një vend që ka jetuar 50 vite në diktaturë” shprehet Topalli pak orë më parë.

(E.K/SHUPLAKA)