Përfshihet nga flakët banesa në Devoll, humb jetën 85-vjeçarja

Në fshatin Bitinckë të Devollit ka rënë zjarr në banesën e një 85-vjeçare.  Nga flakët në këtë banesë ka gjetur vdekjen e moshuara  e cila jetonte e vetme në këtë banesë.  Mësohet se zjarri ka rënë rreth orës 22.30 dhe në vendin e ngjarjes ka shkuar zjarrfikësja e cila ka bërë të mundur shuarjen e flakëve. E moshuara kishte një djalë që jetonte në Greqi i cili është duke ardhur si edhe disa familjarë të tjerë në Durrës. 

Për “Fax News” ka folur Shyqyrie Bletaj, fqinja e të moshuarës e cila ka thënë se  zjarrfikësja erdhi në kohë por s’mundi të bënte asgjë.

“Në orën 9:30 kemi dëgjuar thyerje të xhamave dhe kemi dalë me shpejtësi jashte për të kontrolluar. Pamë që shtëpia kishte marrë flakë dhe lajmëruam policinë dhe zjarrfikesen. Zjarrfikësja erdhi në kohë por s’mundi të bënte asgjë. Mendojmë se shkak është bërë një rezistencë që plaka mbante në shtepi. Ajo kishte dhe sëmundjen e sklerozës.”, u shpreh fqinja. 

DETAJE:

Më datë 20.12.2017, rreth orës 22.30, kemi marrë njoftim se në fshatin Bitinckë-Devoll, ka rënë zjarr në banesën e shtetases Sh.B, rreth 85 vjeçe. Në vendin e ngjarjes ka shkuar Zjarrfikësja, për të bërë të mundur fikjen e zjarrit, si edhe shërbimet e Policisë.

Por si pasojë e flakëve ka gjetur vdekjen shtetasja e mësipërme, e cila jetonte e vetme në këtë banesë. Nga hetimet paraprake dyshohet se kemi të bëjmë me ngjarje aksidentale. Grupi hetimor po punon për të përcaktuar shkaqet e rënies së zjarrit dhe zbardhjen e rrethanave të ngjarjes. (J.V/Faxweb)