Përfundon drekën me 8 ambasadorët e BE-së, Basha: Ua bëra të qartë se unë nuk tërhiqem!

Kreu i opozitës Lulzim Basha përfundon takimin me 8 ambasadorët e Bashkimit Europian. Pas drekës me ambasadorët e Gjermanisë, Polonisë, Hungarisë, Kroacisë, Sllovenisë, Sllovakisë, Hollandës, 

Belgjikës, Basha u shpreh se ua bëri të qartë të gjithëve se opozita nuk heq dorë ngakushti për krijimin e një qeverie teknike, e cila sipas tij garanton zgjedhjet e lira dhe të ndershme.

“Diskutuam për gjendjen politike në vend dhe bashkë me përfaqësuesit e tjerë opozitarë bëmë të qartë vendimin tonë për të mos u tërhequr nga beteja qytetare dhe popullore për zgjedhje të lira dhe të ndershme deri në realizimin e kushtit të vetëm të opozitës që është një qeveri teknike me vullnet të gjerë politik për të garantuar zgjedhje të lira dhe të ndershme.”, deklaroi Basha.

Më tutje, kreu i opozitës u shpreh se ambasadorët nga ana tjetër, u treguan mbështetës ndaj lëvizjes së opozitës.

“Bashkëbisedimi ishte shumë i frytshëm, dashamirës, mbështetës për qëllimet europiane dhe europianizuese të qëndresës, të lëvizjes tonë popullore dhe unë, besoj edhe kryetarët e partive të tjera të koalicionit ndahemi dhe nga kjo drekë me shumë optimizëm dhe akoma me më shumë vendosmëri për t’i shkuar deri në fund kauzës sonë.”, shtoi Basha. (D.D/Shuplaka)