Kreu i Partisë Demokratike Lulzim Basha deklaroi se opozita do të vijojë protestat në të gjithë vendin deri në rrëzimin e qeverisë Rama.
Ndërkohë gjatë fjalës së tij për mediat kreu i PD-së Lulzim Basha u shpreh se PD do të organizojë protesta mbarë popullore në të gjithë vendin. Sipas Bashës do të hartohet një kalendar për të gjithë protestat që do të zhvillohen. Basha shtoi më tej se një tjetër vendim i dalë nga kjo mbledhje është edhe ngritja e shtabeve politike.
“Do të hartohet një kalendar për vazhdimin e protestave në të gjithë vendin. Është marrë një vendim për ngritjen e shtabeve në nivel qendrorë dhe lokal, të cilët në bashkëpunim me opozitën e bashkuar do të bëjnë të mundur organizimin e protestave në të gjithë vendin. Morëm vendimin për shpalosjen e programit të PD. Ne do t’i japim Shqipërisë vizionin tonë me besimin se Shqipëria do të ketë një të ardhme.
Bashkë me qytetarët shqiptarë do të marrim vendime se si do të shkojë kjo e ardhme. Politikat tona për pensionet, për biznesin, sipërmarrjen që të hapë vende pune, politikat tona për zhvillimin ekonomik dhe një vendi në krah të njerëzve. Morëm vendimin për ndërthurjen e këtij turi protestash me një tur programi për Shqipërinë”, tha Basha pas mbledhjes së kryesisë për mediat.
(M.Q/Faxweb.al)
Discussion about this post