Në orën 16:00 të kësaj të marte përfundon afati për tetë anëtarët e emëruar të SPAK për të bërë aplikimet e tyre për kreun e Prokurorisë së Posaçme.
Burime brenda Këshillit të Lartë të Prokurorisë i konfirmuan Fax News se deri në këto momente, edhe pse kanë mbetur më pak se gjashtë orë nga përfundimi i afatit, akoma asnjë prej antarëve të SPAK nuk ka aplikuar për karrigen e drejtuesit.
Të njëjtat burime saktësojnë se kandidaturat pritet të bëhen në limitet kohore të përfundimit të orarit zyrtar.
Me datë 25 Nëntor u zhvillua gara për ngritjen e Strukturës së Posaçme Kundër Korrupsionit dhe Krimit të Organizuar e cila është finalizuar në ambientet e KLP-së, ku u emëruan 8 anëtarët e parë të kësaj strukture, të cilët do të betohen te Presidenti Meta në datën 19 Dhjetor, dhe më pas do të nisin nga puna.
Prokurorët Altin Dumani, Arben Kraja, Behar Dibra, Edvin Kondilli, Elida Kaçkini, Ened Nakuçi, Enkeleda Millonai dhe Klodian Braho janë prokurorët e parë të SPAK, të cilët kanë kaluar në një sitë hetimi në dy shkallët e Vettingut, ndërsa kanë rezultuar të pastër në tre shtyllat e hetimit, pasuri, pastërti figure dhe aftësi profesionale.
Prokurorët e zgjedhur kanë mandat 9-vjeçar, dhe nuk kanë të drejtë rizgjedhjeje (lexo të plotë këtu)
(F.GJ/FAXWEB.AL)
