Arben Kraja është zgjedhur kreu i Strukturës së Posaçme Anti-Korrupsion, (SPAK) me 6 vota të anëtarëve të KLP-së.
Pas skualifikimit të Altin Dumanit me vetëm 4 vota është votuar edhe për Krajën që mori 6 vota ndërsa kandidati tjetër Edvin Kondili nuk ka arritur të kalojë pragun e votave që ishte vendosur për 6 të tilla nga 11 të mundshme.
Kondili mori vetëm dy vota ndërsa pas votimit, kreu i KLP-së Gent Ibrahimi deklaroi se në vijim është në dorën e anëtarëve të zgjedhur të SPAK dhe kryetarit të saj të merret me çështjet më të ‘nxehta’ të hetimit në vend dhe të luftës kundër krimit të organizuar dhe korrupsionit.
“Që nga krijimi i KLP, ky ka qenë momenti më i vështirë për të bërë një zgjedhje, pasi të tre kandidatët kanë qenë të fortë. Sot zgjodhëm gurin e fundit të “mozaikut” të SPAK. Tani fjala është për ta. KLP do t’i japë mbështetjen maksimale, qoftë për pavarësinë e tyre, por edhe mbikëqyrje për sa i përket rezultateve. KLP vendosi: Z. Arben Kraja emërohet drejtues i SPAK”, tha Ibrahimi.
Arben Kraja, prokuror i Prokurorisë së Përgjithshme ka kaluar me sukses procesin e Vetingut, ku ka qenë vendimi i dhënë dhjetorin e kaluar. Seanca dëgjimore u drejtua nga trupa gjykuese e përbërë nga Roland Ilia, Firdes Shuli dhe Etleda Çiftja.
Relatorja Firdes Shuli deklaroi në seancën dëgjimore se sipas raportit të dorëzuar nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI, deklarimi i pasurisë nga ana e prokurorit Arben Kraja është i saktë dhe në përputhje me ligjin.
Në media dhe publik SPAK perceptohet prej kohësh si “bërthama” e drejtësisë së re dhe si struktura që do të hetojë politikanë, prokurorë e gjyqtarë të korruptuar, nisur edhe nga kompetencat e zgjeruara që ligji i njeh kësaj strukture në përbërje të së cilës është edhe Byroja Kombëtare e Hetimit.
(F.GJ/FAXWEB.AL)
