Pas bombës së dytë që hodhi gazetari gjerman Peter Tiede, me publikimin e 16 audio-përgjimeve të tjera të cilat tregojnë aferat korruptive në shit-blerjen e votave gjatë zgjedhjeve të 2017 në Dibër, referuar situatës së rëndë politike kryesia e FRPD-së ka thirrur një mbledhje urgjente në selin blu.
Sipas raportimeve mësohet se në mbledhjen e Kryesisë pritet të diskutohet në lidhje me mënyrën se si do të procedohet gjatë protestës së 21 Qershorit dhe audio-përgjimet e Bild.
Ndërkohë, burime për Faxweb.al bëjnë me dije se qindra simpatizantë dhe militant të Partisë Demokratike janë grumbulluar përballë selisë.
Po ashtu në mbledhje pritet të diskutohet edhe për thirrjen antiligjore, sipas PD-së, që Prokuroria po i bënë kryedemokratit Basha. Kujtojmë se pak orë më parë në kudër-përgjigje të deklaratës së kryedemokratit Basha i cili u shpreh se: “Ishte i gatshëm për t’u paraqitur në prokurori, sapo ajo të zbatojë me përpikmëri ligjin, duke refuzuar zbatimin e ultimatumit të dhënë nga ana e këtij institucioni.”, Prokuroria e Tiranës ka dorëzuar në polici kërkesën për shoqërimin e detyruar të Bashës në datën 20 qershor (lexo këtu).
Basha u thirr si i pandehur nga Prokuroria pak ditë më parë, për të dëshmuar në lidhje me kontratat e lobimit në SHBA, ndërsa së bashku me Bashën janë thirrur edhe ish-sekretari i Përgjithshëm i PD-së Arben Ristani dhe Ilir Dervishi, të cilët po ashtu e kanë cilësuar si të paligjshme thirrjen e Prokurorisë.
