Përjashtimi i gjyqtares Antoneta Sevdari, Ibrahimi: Në gjykimin tim është keqinterpretuar ligji

Kryetari i Këshillit të Lartë të Prokurorisë, Gent Ibrahimi ka komentuar vendimin e Komisionit të Pavarur të Kualifikimit për rastin e përjshtimit nga radhët e gjyqësorit të gjyqtares Antoneta Sevdari.

Ibrahimi tha se një problem i vettingut është fakti se në disa raste është pak më eksesiv seç duhet dhe në rastin e Sevdarit është keqinterpretuar ligji.

“Në kuptimin që ka raste siç është ai i zonjës Sevdari me të cilin organet e vettingut në gjykimin tim kanë keqinterpretuar ligjin. Ligji që kemi ne duke pasur parasysh shkallën e lartë të informalitetit që ekziston në këtë vend, kuashumë transaksione ekonomike, financiare nuk regjistrohen”, deklaroi Ibrahimi në emisionin “Tempora” në ora news.

Pjesë nga diskutimi:  

Ibrahimi: Procesin e krijimit të këshillave nuk e ka zvarritur kërkush, por thjeshtë ka pasur disa tentativa për rrëzimin e ligjeve në Gjykatën Kushtetuese. Gjykata Kushtetuese nuk e ka pezulluar zbatimin e këtyre ligjeve kështu që nuk është bërë shkas…

Pyetje: Ndikimi politik në të gjithë këtë proces ju ka shqetësuar?  Ne po flasim për një reformë të madhe që po ndërmerret nga një klasë politike me kredibilitet që në një mënyrë apo në një tjetër këput degën që ka krijuar vetë. 

Ibrahimi: Tani të kritikojmë klasën politike vetëm se ndërmori këtë reformë dhe se mund të këpusi degën që krijoi vetë? 

Pyetje: Jo. Nuk e kritikojmë, por fakti që sot ndodhemi në këto vakume dhe në pamundësi për të zgjedhur një prokurore sipas ligjit të duhur, të kemi një veting më të besueshëm, veprime më ligjore e kështu me radhë, problemet politike do përdoren.

Ibrahimi: Kush është i pakënaqur nga vetingu? 

Pyetje: Zonja Sevdari përshembull. 

Ibrahimi: Problemi që kam unë me vetingun është se po tregohet në disa raste pak më eksesiv seç duhet. 

Pyetje:  Në çfarë kuptimi? 

Ibrahimi: Në kuptimin që ka raste siç është ai i zonjës Sevdari me të cilin organet e vetingut në gjykimin tim kanë keqinterpretuar ligjin. Ligji që kemi ne duke pasur parasysh shkallën e lartë të informalitetit që ekziston në këtë vend, ka shumë transaksione ekonomike, financiare nuk regjistrohen.

(F.GJ/FAXWEB.AL)