Një tjetër seancë është zhvilluar në Gjykatën e Shkallës së Parë në Shkodër lidhur me çështjen e ceremonisë përkujtimore të ushtarëve serb dhe malazez në fshatin Gajtan të njësisë Gur i Zi.
Seksioni i Antiterrorit i kërkoi Gjykatës së Shkodrës që Prokuroria të bëjë çeljen e hetimeve si dhe kryerjen e disa veprimeve të tjera hetimore që kanë lidhje me këtë ngjarje. Të pranishëm në sallën e gjyqit ishin vetëm njëra palë, seksioni i Antiterrorit të Policisë ndërsa nuk ishte i pranishëm prokurori i çështjes Ermir Lelçaj.
Më herët ky seksion ka ngritur një akuzë për nxitje të urrejtjes etnike por Gjykata vendosi mosfillimin e këtij procedimi.
U kërkua gjithashtu të hetohen përfaqësuesit e shoqatës Rozafa Moraça dhe Shën Jovan Vladimiri si organizatorë të vendosjes së kryqit serbo-malazez dhe përkujtim të ushtarëve të vrarë në 1912-1913 të cilët erdhën për të pushtuar Shkodrën.
Antiterrori kërkoi që të ndiqet penalisht Pavlo Jakoja si përfaqësues i shoqatës Rozafa Moraça si dhe të bëhet pyetja e të gjithë personave të pranishëm në ceremonial duke përfshirë edhe të huajt që kanë qenë aty për të parë rolin e tyre dhe verifikimin e të gjithë institucioneve për të parë se e kujt është toka si territor atje ku është vendosur kryqi serbo malazez në Gajtan të njësisë Gur i Zi ndërsa gjatë kësaj seance u konfirmua se Bashkia Shkodër nuk ka dhënë një leje për vendosjen e kryqit atje.
Gjatë seancës Gjyqtarja Izabela Radovani i është drejtuar seksionit të Antiterrorit duke i thënë se Prokuroria pretendon se Policia s’mund të jetë kallëzuesi, por specialistët e Antiterrorit deklaruan se ata kanë kryer të gjitha aktet e duhura proceduriale.
Në seancat e mëparshme për këtë çështje ka pasur përplasje mes Prokurorisë dhe Seksionit të Antiterrorit ndërsa ende nuk ka një vendim nga gjykata për të nisur ose jo hetimet nga ana e Prokurorisë.
Ushtarët serbo-malazez erdhën në Shqipëri para 106 vitesh si pushtues.
Discussion about this post