Një protest e organizuar nga Aleanca Kuq e Zi po zhvillohet këto moment përpara kryeministrisë. Data e sotme shënon 6 vite nga 21 janari i vitit 2011 ku në ‘’Bulevardin Dëshmorët e Kombit’’, u vranë në mes të një proteste katër persona.
Disa prej protestuesve janë përleshur edhe me policinë, pasi kanë hedhur mjete tymuese në drejtim të kryeministrisë. Ndërkohë që përpara kryeministrisë janë shtuar forcat policore të pranishme.
4 aktivistë të AAK-së Erald Sefa, Besjon Zeka, Besmir Kajaj dhe Shefki Sefa, janë shoqëruar nga policia pas konfrontimeve.
Kreshnik Spahiu i cili prin këtë protestë është shprehur se për këtë ngjarje duhet drejtësi, e cila nuk jepet prej vitesh.
”4 viktima dhanë jetën për të sjellë ty në pushtet o maskara. Fshihu fshihu Edi Rama! Vite më parë duhet të ishe duke hedhur lot krokodili. Po këtë radhë nuk pate kurajo, 2 ditë para u trembe nga protesta. Po pse mor zagar, shpatullat e këtyre qytetarëve të paguajnë padrejtësinë tënde?! Prandaj ti meriton domate e kastraveca, çdo mjet për të sjellë ndryshimin”, iu drejtua Kreshnik Spahiu kryeministrit.
Ndërkohë gjatë gjithë protestës u përmend një datë 2 marsi. Ditë kur Spahiu njoftoi nisjen e të tjera protestave kundër qeverisë që do të kulmojnë me ngritjen e çadrave pranë kryeministrisë. (E.K/SHUPLAKA)
Discussion about this post