Në një shtëpi të pabanuar në zonën e Shkëmbit të Kavajës në Durrës rreth orës 15.00 shërbimi përmbarimor ka shkuar për të ekzekutuar sekuestron e banesës për llogari të një banke ku rezultonte me kredi.
Kur përmbarimi ka hyrë brenda bashkë me policinë kanë gjetur dy armët e përshtatura për sniper me silenciator, një pistoletë dhe një sasi kanabisi.
Policia e Durrësit ka shkuar në vendngjarje dhe ka bërë sekuestrimin e armëve të zjarrit. Nga verifikimet paraprake rezulton se pronari është emigrant në SHBA.
Policia e Durrësit pritet të kontaktojë me shtetasin në fjalë, identiteti i të cilit nuk bëhet ende i ditur, për të zbardhur më shumë detaje mbi këtë ngjarje.
Ndërkohë armët janë çuar për ekspertim në laboratorin e krminalistikës, pasi dyshohet se ato mund të jenë përdorur në ndonjë krim të regjistruar në Durrës, ose në ndonjë qytet tjetër të vendit.
(M.Q/Faxweb)
