Sot është përmbyllur program 3-vjeçar i bashkëpunimit të qeverisë shqiptare me Fondin Monetar Ndërkombëtar, për të cilin ministri i Financave, Arben Ahmetaj, është shprehur se u arritën objektivat kryesore.
Ai theksoi se marrëveshja e radhës me FMN-në do të realizohet nga qeveria “Rama 2”. Marrëveshja parashikon lëvrimin e kësteve të nëntë dhe të dhjetë të programit 36-mujor të Fondit Monetar Ndërkombëtar me Qeverinë Shqiptare.
Duke u ndalur tek reformat e thella në sektorët kyç, Ahmetaj u shpreh se ndër të tjera se skema aktuale pensioneve ka bërë që deficit i pensioneve të ulet në nivelin 1.8% të PBB-së nga 2.2% të PBB-së, ndërsa në sektorin e energjisë humbjet në rrjet janë ulur në 28%.
Totali i kësteve është 72.4 milionë euro. Programi 36 mujor është miratuar më 28 shkurt 2014 dhe parashikon një kredi prej 370 milionë euro, e shpërndarë në 10 këste në 3 vjet.
Në fjalën e saj, përfaqësuesja e FMN-së në Shqipëri, Anita Tuludhar, u shpreh ndër të tjera se Ekipi i FMN-së parashikon fuqizim të ekonomisë. Rritja e PBB-së pritet të ketë arritur në 3,4 për qind në vitin 2016 dhe parashikohet të përshpejtohet në rreth 4% në periudhën afatmesme.
“Vitin që shkoi inflacioni mesatar arriti 1,3 për qind, në përputhje me kërkesën e brendshme në rritje, si dhe pritet të vijojë të rritet gradualisht derisa të arrijë normën e synuar prej 3 për qind në vitin 2018. Defiçiti i llogarisë korrente pritet të zgjerohet për shkak të nivelit të lartë të importeve që nevojiten për projektet e sektorit energjetik, nga rreth 12 për qind e PBB-së në 13,5 për qind e PBB-së në 2017-2018.”, u shpreh Tuludhar. (XH.A/SHUPLAKA)
