Një nga surprizat e Valverde ishte përfshirja e Rakitic në listën e “ekspeditës” në Pamplona. Vetëm 24 orë më parë, plani ishte krejt ndryshe për kroatin. Ai mund ta linte Barcelonën, sepse ishte lojtari i vetëm i saj, që kishte pranuar të ulej dhe të negocionte me PSG për të qenë pjesë e “operacionit Neymar”. Aq shumë dukej konkrete kjo hipotezë, sa në zyrat e PSG tashmë ishte montuar video e prezantimit të kroatit, ishin gati njoftimet për ardhjen e tij. Madje, u bë dhe planifikimi i mirëseardhjes së tij në rrjetet sociale.
Palët e morën si gjë të mirë dhe fakt të kryer firmosjen e mesfushorit. Sidoqoftë, diçka u shtrembërua në minutën e fundit. Me siguri diçka lidhet me refuzimin e Barçës për të paguar vetëm para “cash” për Neymar. Për pasojë, kroati e pa veten në një “botë tjetër” sa hap e mbyll sytë. Boshatisi valixhet, që i kiste bërë gati për në Paris, dhe udhëtoi dje për në Pamplona. Kjo mund të kuptohet si një shenjë e autoritetit nga ana e trajnerit, i cili e ka një nga “flamujt” e tij Ivan, ose si paralajmërim ndaj PSG, që të mos marrë asgjë të mirëqenë përpara kohës së vet.
Mbetet për t’u parë nëse sot, në “El Sadar”, do të ketë minuta loje për Rakitic apo jo. Ai nuk ka startuar në asnjërën prej dy ndeshjeve të para të La Liga-s. Ndaj Betis nuk luajti asnjë minutë, një rrethanë e pazakontë, që nga ardhja e trajnerit Valverde.
Discussion about this post