Situata e përmbytjeve vijon të mbetet e vështire në Darzezë mëngjesin e sotëm, në derdhjen e lumit Vjosa në hidrovor. Sipas informacionit të Shtabit të Emergjencave të Bashkisë Fier të gjitha forcat e ushtrisë dhe bashkisë janë përqëndruar në Darzezë pasi të gjitha ujërat kullojnë dhe grumbullohen në Darzezë aty ku ndodhet hidrovori i Darzezës.
Ushtria po punon për të ndertuar urën e dëmtuar një nate më parë që ndan fshatin e banuar me tokat bujqësore. Për të forcuar argjinaturën e lumit Vjose në grykederdhje të tij janë angazhuar me qindra forca dhe mjete të cilat kanë hedhur inerte në argjinaturën e hidrovorit.
Kjo punë ka shmangur ndërkohë përmbytjet e banesave në Darzezë ndërsa në Hoxharë të re në disa banesa në tokat bujqësore si dhe në stane bagëtish ka prani të ujit. Ndërkohë lumi Vjosë është tërhequr që prej ditës së djeshme dhe vijon tërheqjen në shtratin e tij natyral. Rruga Levan -Mifol është e hapur që prej mesditës së ditës së djeshme.
Megjithatë uji vijon të jetë ende i pranishëm në gati 300 banesa të Ferrasit për shkak se ka mbetur ne pasi nuk ka kanalizime. Situatë e tillë është e njëjtë edhe në Kashishtë, Cerven, Hambar, Qarr , Martin, Bishan dhe Pish Poro. Rreth 5000 ha tokë bujqësore janë ende në ujë dhe janë dëmtuar 100 ha sera në këtë zonë.Tani mbetet puna e komisioneve për vleresimin e dëmeve në këtë zonë.
(E.K/Faxweb)
