Presidenti i Republikës, Ilir Meta ka deklaruar se vendi ka bërë hapa prapa duke kaluar nga një demokraci parlamentare në një liderizëm arbitrar.
Sipas tij është e vështirë që të ndryshohen liderët pa ndryshuar sistemin zgjedhor duke argumentuar: “Nga një demokraci parlamentare kemi kaluar në një liderizëm arbitrar. Kemi bërë hapa prapa sa i takon demokracisë parlamentare dhe kemi bërë hapa para drejt një liderizmi arbitrar. Pa ndryshuar sistemin zgjedhor është e vështirë të ndryshosh liderët. Mos harrojmë që jemi një vend që kemi një trashëgimi autoritare dhe për shkak të këtij graviteti çdo hapësirë që mund t’i lihet liderit e çon atë drejt autoritarizmit”.
Meta deklaroi në emisioni “Përballë” në RTSH se kjo gjendje duhet të marrë fund, duke shtuar se jemi në kohë për të mos shkuar drejt një konfrontimi që do të ishte i pafalshëm për të gjithë. Me këtë Meta ka kujtuar edhe vitin 1997 duke theksuar se rrezikohen arritjet e vendit.
“Kjo gjendje duhet të marrë fund. Jemi në kohë për të mos shkuar drejt një konfrontimi që do të ishte i pafalshëm për të gjithë. Nuk duhet të rrezikojmë arritjet e vendit nga viti 1997 dhe në këtë drejtim duhet një reflektim nga të gjithë për të rikthyer vendin në një normalitet kushtetues”, tha Meta.
(F.GJ/FAXWEB.AL)
