Përplasja me armë në Vlorë, kush është 27-vjeçari shenjestër e atentatit

Pas përplasjes me armë që ndodhi paraditen e sotme në zonën e Lungomares në Vlorë, kanë dalë detaje të reja rreth ngjarjes.

Dyshohet se shenjestër e atentatit ka qenë shtetasi me inicialet I.H 27-vjeç.

27-vjeçari njihet me precedent të mëparshëm penal dhe ndaj tij në vitin 2017 është bërë një tjetër atentat me tritol ku mbeti i plagosur.

Në atë kohë 27-vjeçari ndodhej në automjetin e tij tip “Jeep”,  dhe po udhëtonte nga Prefektura në drejtim të zonës së quajtur “Bishti i Kalldrëmit” dhe mbeti i plagosur rëndë si pasojë e një shpërthimi më eksploziv.

Pista kryesore e hetimeve ishte ajo e prishjes së pazareve të drogës, nga e cila mund të kenë rrjedhur një seri ngjarjesh.

Dyshohet se në përplasjen e sotme me armë kanë qenë të përfshirë tre persona, ndërsa janë gjetur të djegur dy mjete.

Makinat e djegura janë gjetur në fshatin Bunavi dhe në fshatin Kërkovë, ndërsa dyshohet se personat e përfshirë në përplasjen me armë janë larguar me këmbë.

Policia thotë se ka pikasur autorët, dhe po kreh të gjithë zonën.

Kujtojmë se nga përplasja me armë që ndodhi në Lungomare u plagos një person, që dyshohet se ishte këmbësor, dhe nuk kishte lidhje me ngjarjen.

Dajko Cenodemaj ka mbetur i plagosur në këmbë është dërguar drejt spitalit, dhe fatmirësisht ndodhet jashtë rrezikut për jetën (lexo ketu).

(F.GJ/FAXWEB.AL)