Të tjera detaje janë zbuluar nga përplasja me armë që ndodhi mbrëmjen e kaluar te “Komuna e Parisit” në Tiranë.
Sipas detajeve të policisë, i plagosuri Lorenc Hoxha nuk ndodhej vetëm në makinë, por ishte i shoqëruar nga një shok.
Mësohet se kanë qenë dy automjete të cilat kanë shkëmbyer zjarr mes tyre, ku i i plagosuri me mikun e tij udhëtonin në mjetin tip Benz me targë AA 777 RT.
Ndërsa autorët kanë qenë duke lëvizur me mjetin tip “BMV X5”, dhe kanë tentuar të vrasin me armë zjarri shtetasit B.H, dhe L.H, vjeç 30 e 25, banues në Bulqizë e Tiranë. Por vetëm 25-vjeçari Lorenc Hoxha është plagosur në shpatull.
Policia bën me dije se “Benzi” rezulton në emër të Xhevdet Hoxhës. Mirëpo ende nuk është e qartë se çfarë lidhje ka ky me të plagosurin. Ky i fundit ndodhet në spital nën kujdesin e mjekëve.
Informacioni zyrtar nga Drejtoria Vendore e Policisë Tiranë, Seksioni për krimet ndaj jetës
Më datë 03.08.2017, u referuan materialet në Prokurorinë e Rrethit Gjyqësor Tiranë, për shtetasit K.K, I.Q, D. R dhe L. R, vjeç 27, 26, 27 e 23, banues në Tiranë, pasi dyshohet se në rrugën “Sulejman Delvina”, duke lëvizur me mjetin tip “BMV X5”, në bashkëpunim, kanë tentuar të vrasin me armë zjarri shtetasit B.H, dhe L.H, vjeç 30 e 25, banues në Bulqizë e Tiranë, për pasojë është plagosur L.H, i cili ndodhet në spital jashtë rrezikut për jetën të cilët kanë qenë duke lëvizur me mjetin tip “Benz”.
Punohet për kapjen e K.K, I.Q, D.R, e L.R, dhe gjetjen e mjetit tip “BMV X5”. Nenet 78, 22 e 25 të Kodit Penal.
Informacioni paraprak nga Policia pas ngjarjes:
Më datë 03.08.2017, në Numrin e Emergjencave 112, rreth orës 19:55, ka ardhur një telefonatë për shkëmbim zjarri në kryqëzimin e Komunës së Parisit.
Në vendngjarje kanë mbërritur shërbimet e policisë dhe ambulanca.
Nga hetimet paraprake ka rezultuar se ka pasur një shkëmbim zjarri midis disa mjeteve, ku për pasojë ka mbetur i plagosur në shpatull shtetasi L.H., 24 vjeç, i cili ndodhet në spital nën kujdesin e mjekëve.
Janë ngritur pika kontrolli në hyrje-dalje të qytetit. Vazhdon krehja e zonës.
Grupi hetimor po punon për identifikimin dhe kapjen e autorëve dhe zbardhjen e plotë të rrethanave të ngjarjes. (D.D/Shuplaka)
