Partia e Gjergj Bojaxhi “Sfida për Shqipërinë” ka reaguar lidhur me incidentin e sotëm në qytetin e Shkodrës, ku forcat e policisë bashkiake u përplasën me ato të rendit.
Nëpërmjet një njoftimi për mediat, Sfida për Shqipërinë, këtë incident e konsideron si shembull të politizimit të strukturave të shtetit.
“Incidenti në Shkodër është një rast flagrant se si institucionet e politizuara kanë së pari qëllim interesat e ngushta vetjake dhe politike, ndërkohë që propritet duhet të jenë qytetarët.”, thuhet në njoftim.
REAGIMI I PLOTË
SFIDA: Përplasja mes policive, shembull i politizimit të shtetit
SFIDA për Shqipërinë ka deklaruar se dënon përplasjen e sotme mes policisë bashkiake dhe asaj të rendit në Shkodër duke e cilësuar si shembull të politizimit të strukturave të shtetit.
Përmes një deklarate për mediat, SFIDA thotë se shteti duhet ta përdorë administratën për t’u shërbyer qytetarëve dhe jo interesave politike të palëve që drejtojnë bashkitë apo qeverinë.
“Incidenti në Shkodër është një rast flagrant se si institucionet e politizuara kanë së pari qëllim interesat e ngushta vetjake dhe politike, ndërkohë që propritet duhet të jenë qytetarët.”
Duke marrë shkas edhe nga ngjarja, SFIDA ka bërë publike alternativën e saj për Administratën Publike, ku si qëllim ka pikërisht depolitizimin dhe transparencën në një reformim tërësor të saj.
“SFIDA propozon alternativë ndryshe për Administratën Publike e cila përfshin: Vetting për administratën dhe ekzekutivin politik; reformë rrënjësore e ligjit të administratës publike, si edhe dëmshpërblime financiare për punonjësit e pushuar për arsye politike. Administrata duhet të jetë publike dhe t’i largohet përgjithmonë politikës. Bashkë, mundet!”, thuhet në deklaratën e partisë SFIDA.
Në zgjedhjet e 18 qershorit, Gjergj Bojaxhi, Ermal Hasimja, Blerina Turdiu e Medlir Mema, janë disa nga kandidatë e SFIDËS, me numrin 6 në fletën e votimit. Kryetar administrativ është Hektor Ruci. (D.D/Shuplaka)
Discussion about this post