Një banor i Kaçinarit në Mirditë ka folur për Fax News në një lidhje telefonike me gazetarin Enea Meksi ku ka deklaruar se ka pasur sërish përpjekje të firmës së HEC-ve për të rinisur punimet në zonën e tyre, ndërsa janë ndaluar nga banorët.
Fran Frroku tregon se janë shoqëruar ditën e djeshme nga Policia 4 persona mes të cilëve një 87-vjeçar ndërsa së fundmi janë lënë të lirë pas presioneve që sipas tij u janë bërë nga blutë e Mirditës.
Frroku tregon se 300 banorë kanë firmosur kundër ndërtimit të HEC-eve në zonën e tyre përkundër 30 firmave që kanë dhënë aprovimin e tyre për të nisur punimet, ndërsa shton se për mbrojtjen e pronës nuk kanë pse kërkojnë ndihmë nga policia sepse e mbrojnë vetë.
Ai ka përmendur edhe procesin gjyqësor që vijon në Gjykatën e Lezhës pavarësisht të cilit firma sipas tij ka tentuar disa herë të nisë punimet.
“Dolën disa banorë të fshatit për ndalimin e punimeve dhe i kthyen mbrapsht, erdhi policia dhe shoqëron 4 persona, arreston një 87-vjeçar dhe tre persona të tjerë. Është e 13 herë që protestojmë për këtë punë, kemi hapur edhe gjyq për firmën, ajo firmë na merr jetën duke na marrë ujin. Ne i bie të shpërngulemi nga fshati. Ata që janë shoqëruar sapo janë liruar, u kanë marrë shenjat e gishtërinjve, i kanë pyetur dhe bërë presione që të mos merren më me mbrojtjen e lumenjve. Ne nuk i lejojmë ata, kam pasur kontakt personalisht me 2 përfaqësuesit e firmës, njëri erdhi për herë të parë, e kthyem mbrapsht, populli i Kçinarit dhe Simonit e gjithë zonës janë të vendosur, janë 300 firma banorësh kundër ndërsa vetëm 20-30 persona kanë firmosur duke u manipuluar.
Çështja gjyqësore ka qenë tek Krimet e Rënda në Tiranë, tani është zhvendosur në Gjykatën e Lezhës, firma është përpjekur vazhdimmisht që ndonëse ka një proces të hapur të vijojë punimet. Ne e kemi kundërshtuar dhe do ta kundërshtojmë, janë marrë firma false, nuk bëjmë denoncim për mbrojtjen e pronës tonë, kur të na vijnë ne mbrojmë pronën tonë. Kemi zgjedhur një përfaqësi prej disa personash, kemi bërë një takim me prefektin i cili na priti një përfaqësi të vogël. Prefekti na ka thënë që do mundohet në të tijën”, tha Fran Frroku, banor i zonës.
(F.GJ/FAXWEB.AL)
