Kreu i Partisë Demokratike Lulzim Basha ka reaguar për përplasjen e ndodhur tek Bregu i Lumit midis forcave të policisë, banorëve të zonës që do t’ju shemben shtëpitë dhe ish-deputetëve të opozitës.
Më anë të një postimi në rrjetet sociale, Basha shprehet se dhunuesi i një banoreje dhe i ish-deputetëve është “është shefi i komisariatit 4, Agim Hoxha, një bandit me uniformë, që ka dhunuar më parë edhe qytetarët dhe përfaqesueset gra të opozitës”.
Ai shprehet se dhunuesi tjetër është drejtuesi i policisë Bashkiake që sipas Bashës ka rrahur dhe dhunuar më parë eshe gjyshet që shesin prodhimet e bahçes për të mbajtur frymën gjallë si dhe shumë qytetarë të pambrojtur.
“Edi Rama nuk mund ta mbajë më pushtetin e tij të paligjshëm veçse duke përdorur dhunën: dhunë kundër qytetarëve, dhunë kundër gazetarëve, dhunë kundër kundërshtarëve politikë, dhunë kundër Kushtetutës”, shkruan Basha përkrah një videoje nga përplasja e ditës së sotme tek Bregu I Lumit.
Statusi i plotë:
Dhunuesit që shqiptarët panë sot duke rrahur një grua të dëbuar me forcë nga shtëpia e saj, dhe duke goditur përfaqësuesit e opozitës në mbështetje të banorëve te dëbuar janë fytyra e vërtetë e Edi Ramës.
Dhunuesi i zonjës tek Bregu i Lumit është shefi i komisariatit 4, Agim Hoxha, një bandit me uniformë, që ka dhunuar më parë edhe qytetarët dhe përfaqesueset gra të opozitës.
Dhunuesi tjetër është fytyra e Erion Velisë në Policinë Bashkiake, që ka rrahur dhe dhunuar më parë eshe gjyshet që shesin prodhimet e bahçes për të mbajtur frymën gjallë si dhe shumë qytetarë të pambrojtur.
Edi Rama nuk mund ta mbajë më pushtetin e tij të paligjshëm veçse duke përdorur dhunën: dhunë kundër qytetarëve, dhunë kundër gazetarëve, dhunë kundër kundërshtarëve politikë, dhunë kundër Kushtetutës.
Dhunë ndaj kujtdo që i tregon ligjin Edi Ramës, qoftë ky artist që mbron teatrin, qytetar që mbron shtëpinë apo opozitar që mbron të drejtat e qytetarëve.
Thirrja ime për çdo shqiptar është të qëndrojmë në këmbë! Të qëndrojmë të bashkuar dhe të vendosur për t’i dhënë fund dhunimit të Shqipërisë nga një grup banditësh me pushtet të vjedhur e të blerë me krimin.
Së bashku do të bëjmë të mundur që dhunuesit e shqiptarëve, nga Edi Rama deri tek banditët me uniformë, të japin llogari para ligjit për çdo padrejtësi!
Ndërkohë, nga ana tjetër LSI, ka kallëzuar penalisht drejtuesin e Komisariatit numër 4, Agim Hoxha në Prokurorinë e Tiranës.
Kallëzimi I LSI-së ka ardhur për dhunën e ushtruar ndaj qytetares që mbronte banesën e saj në Bregun e Lumit.
Kujtojmë që ditën e sotme polici goditi me shpullë gruan e cila kundërshtoi forcat e policisë pasi kishin rrethuar banesën e saj me qëllim prishjen (lexo këtu).
(F.GJ/FAXWEB.AL)
Discussion about this post