Përplasje kokë me kokë, Volkswagen-i kthehet përmbys. Të plagosurit drejt spitalit të Korçës (PAMJE)

Një aksident i rëndë ka ndodhur në aksin nacional Korçë-Bilisht, në afërsi të fshatit Cangonj.

Nga raportimet paraprake, aksidenti ka ndodhur vetëm pak minuta më parë, ku një mjet “Benz” ngjyrë të bardhë është përplasur kokë më kokë me një mjet Volkswagen Caddy të kuq, çka ka sjellë përmbysjen e këtij të fundit në anë të rrugës.

Tre të plagosur janë transportuar drejt spitalit të Korçës, ende nuk dihet gjendja e tyre shëndetësore, burimet bëjnë me dije që të plagosur janë 2 femra dhe një mashkull, ku njëra prej grave të plagosura është në gjendje të rëndë shëndetësore.

Ndërkohë njoftohet edhe për dëme të shumta materiale pasi përplasja ka qenë shumë e fortë.

Policia në vendngjarje po punon për zbardhjen e shkaqeve të aksidentit.

Njoftimi i Policisë: Dvp Korçë/Informacion paraprak

Më datë 29.05.2023, rreth orës 16:10, në aksin rrugor Bilisht-Korçë, në afërsi të fshatit Cangonj, janë përplasur 2 automjete. Për pasojë, janë dëmtuar 3 shtetas, të cilët u transportuan për mjekim në spitalin e Korçës.

Grupi hetimor po kryhen veprimet proceduriale dhe po punon për përcaktimin e shkaqeve të aksidentit.