Dy anije janë përplasur në portin e Igumenitsës pak pas orës 10:00 të mëngjesit të së enjtes.
Përplasja ndodhi kur anija ECO CATANIA e kompanisë italiane Grimaldi, e ngarkuar me mallra dhe me 34 anëtarë të ekuipazhit, po përpiqej të ankorohej.
Ajo ka goditur – në rrethana ende të paqarta –anijen e ankoruar KYDON PALACE të kompanisë greke Minoan Lines me 95 anëtarë të ekuipazhit.
Përplasja ka shkaktuar një të çarë të konsiderueshme tek anija e ankoruar.
Burime nga porti i Igumenicës bëjnë me dije se nuk ka pasur të lënduar. Gjithashtu nuk është vërejtur ndotje e detit nga karburanti i dy anijeve dhe as hyrje të ujit në to.
Autoritetet portuale po kryejnë një hetim paraprak për shkaqet e përplasjes, ndërsa është në zhvillim një inspektim teknik për dëmtimet e tjera të mundshme.
Të dyja anijet janë urdhëruar të qëndrojnë të ankoruara në port derisa të paraqitet një certifikatë lundrimi nga një kompani e klasifikuar për këtë raste.
