Presidenti i Republikës së Shqipërisë, Bujar Nishani, ka reaguar pas akuzave të ashpra të Visar Zhitit drejtuar atij, pas dekretimit të Fatmir Xhafajt si ministër i Brendshëm. Në reagimin e tij, jo më pak të ashpër, shprehur për një gazetë të përditshme, Kreu i Lartë i Shtetit e akuzon Zhitin për paqëndrueshmëri psikike.
Fillimisht ai flet për kërkesën e emërimit të tij si ambasador në Vatikan dhe shkakun që e shtyu Nishanin të mos e dekretonte. Ai rrëfen se në një takim që pati me të në zyrë, konstatoi paqëndrueshmëri psikike.
“Kur u bë publik propozimi i kryeministrit Rama për ta emëruar Zhitin ambasador në Selinë e Shenjtë, unë mora mesazhe dhe dëshmi nga ish-i përndjekuri politik P.V., i cili e akuzonte Zhitin si bashkëpunëtor të administratës së Burgut të Spaçit në vitet 1982 -1983 në procese të ridënimit të të burgosurve në atë burg.
Por nuk ishte kjo arsyeja që unë nuk e emërova. Arsyeja që nuk e emërova Zhitin kishte të bënte me mosrespektimin e e procedurës ligjore të propozimit nga qeveria, të deklaratave publike të papranueshme të Zhitit ndaj Kishës Katolike dhe pas një takimi që pata në zyrën time, konstatova një paqëndrueshmëri psikike.”, mësohet të jetë shprehur Nishani.
Shkrimtari dhe diplomati shqiptar Visar Zhiti, në shkrimin e tij e akuzon Nishanin si një persekutor, një njeri të paaftë, i cili u emërua ngaqë s’kishte emër.
(XH.A/SHUPLAKA)
