Sot opozita ndryshoi strategjinë e mënyrës së zhvillimit të protestës, pasi gjatë paradites të rinjtë e FRPD dhe të LRI protestuan para Parlamentit ndërsa në orët e pasditës bllokoi të gjitha akset rrugore kryesore të vendit.
Kryetarja e LSI-së Monika Kryemadhi deklaroi gjatë mbrëmjes së sotme në emisionin “Open” se qytetarët janë sensibilizuar me kauzën e opozitës dhe paralajmëroi kryeministrin Rama ikja nga protestuesit tregon frikën që ai ka.
“Ne nuk pamë qytetarë të irrituar, përkundrazi ishin solidarë. Pamë shumë makina që kishin hapur krahun në anë të rrugës, duke treguar solidaritet. Ky është një nga hapat që ka hedhur opozita, e do të ketë vazhdimësinë e saj. Gjithçka është në bazë të një strategjie dhe plani, që do të jetë i befasishëm. Pse? Sepse kryeministri është larguar gjithnjë sa herë ka pasur protesta dhe nuk ka tentuar të qëndrojë e të përballet me njerëzit. Kjo tregon frikën që ka ai, ose s’do të përballet me opinionin mbi këtë situatë”, tha Monika Kryemadhi.
Ajo tha se në të kaluarën, kryeministrat nuk janë larguar por kanë qëndruar në zyrat e tyre.
“Kjo është një zgjedhje e gabuar e Ramës, pasi një ditë ai do të përballet me njerëzit”, tha më tej kryetarja e LSI-së.
Kryemadhi tha se është çështje e Ramës nëse ikën apo nuk ikën, por duke ironizuar edhe deklaratat e këtij të fundit ajo tha: “Çdo ditë që ai qëndron, fati i tij bëhet gjithnjë e më i zi, meqë i ka qejf këto fallxhoret”.
(F.GJ/FAXWEB.AL)
Discussion about this post