Janë përzgjedhur pesë gjyqtarët e trupit gjykues që do të rigjykojë në Apel Dritan Dajtin. Bëhet fjalë për pesë emra që vijojnë të ushtrojnë detyrën në Gjykatën e Apelit në Shkodër.
Pavarësisht se kanë kaluar më shumë se gjashtë muaj nga verdikti i Gjykatës së Lartë, rigjykimi i të dënuarit Dajti nuk vijonte për shkak mungesës së një trupi gjykues. Përballë kësaj situate, Këshilli i Lartë i Drejtësisë vendosi që të delegojë pesë gjyqtarë të Apelit Shkodër për rigjykimin e dosjes së Dajtit.
“Burime pranë Apelit bëjnë të ditur trupin gjykues që do të ketë në dorë dosjen”, bën me dije një portal online. Mësohet se trupi gjykues që do të ketë në dorë çështjen e Dritan Dajtit përbëhet nga gjyqtarja Marina Rroboshta, kryesuese, dhe gjyqtarët Hajrie Muçmata, Aleks Nikolla, Luan Dervishi dhe Selim Kryeziu, anëtarë.
Dritan Dajti, i dënuar me burgim të përjetshëm në Shkallën e Parë të Krimeve të Rënda, akuzohet për vrasjen e katër policëve më 7 gusht 2009 në Durrës. Ai u dënua përjetë në korrik 2014. Vendimi u prish nga Apeli, i cili e ktheu dosjen për rigjykim. (XH.A/SHUPLAKA)
Discussion about this post