Tani që 2016-ta kaloi a jeni kuriozë të mësoni se sa para kanë shpenzuar institucionet gjatë këtij viti dhe mbi të gjitha, cili ka shpenzuar më shumë?
Open Data Albania ka bërë një renditje të pesë insitucioneve që kanë kryer më shumë pagesa në formë shpenzimi, nga 1 janari deri më 30 dhjetor të 2016-ës.
Drejtoresha e Open Data Albania, Aranita Brahaj shkruan se institucioni që ka kryer më shumë shpenzime është pikërisht Bashkia e Tiranës.
Renditja:
- Bashkia e Tiranës (pa institucione të vartësisë), me pagesa në vlerën 7 969 643 760 Lekë.
- Autoriteti Rrugor Shqiptar me pagesa në vlerën 7 067 673 877 Lekë. Ky autoritet i rëndësishëm për investime në infrastrukturë, ka pësuar një rënie drastike të pagesave në vitin 2016 kundrejt vitit 2015 dhe 2016. Në vitin 2015 pagesat e tij ishin 19.24 miliard lekë ndërsa në vitin 2014 Pagesat e Autoritetit Rrugor Shqiptar ishin 24.28 miliard lekë.
- Qendra Spitalore Universitare Nënë Tereza QSUT me 5 723 363446 Lekë.
- Aparati i Ministrisë së Financave 4 027 173 416 Lekë. Listuar këtu. Vetëm për kategorinë e shpenzimit Penalitete (interesa) për vonesën e ekzektuimit të Vendimeve të Gjykatës Europiane për të Drejtat e Njeriut dhe Shpenzime të tjera të Papaguara, Ministria e Financave për llogari të shtetit dhe taksapaguesit shqiptar, ka paguar në muajin Dhjetor 2016 rreth 1.87 miliard lekë. Çështjet kundër shtetit Shqiptar: Rista, Halimi, Karagjozi, Alicka dhe Mirela Sinani.
- Aparati i Ministrisë së Punës si llogari pranë Thesarit, por njohur si Ministria e Shanceve të Barabarta me 3 122 324 102 lekë.
Në faqen zyrtare të Open Data të gjitha transaksionet e kryera jepen me detaje. (D.D/Shuplaka)
