Gati një muaj më parë, kryetari i Mitrovicës, Agim Bahtiri, dorëzoi në Kuvend peticionin me rreth 17 mijë nënshkrime të qytetarëve për bashkimin e Mitrovicës së Jugut me atë të veriut, por ai ende nuk është trajtuar në Komisionin për Peticione në Kuvend.
Anëtarë të këtij komisioni thonë se kjo çështje tejkalon kapacitetet e komisionit, meqë është temë më serioze sesa kaq. Lirie Kajtazi nga LDK-ja, ka thënë se, në shumicën e rasteve, peticionet kanë shërbyer si mjet i politikës ditore e nuk e kanë pasur qasjen e duhur.
Ajo tha se ata që i udhëheqin peticionet, pasi të arrijnë një efekt politik të subjektit, i lënë edhe vetë në harresë ato.
Ndërkohë, Teuta Haxhiu tha se është interesuar të dijë për fatin e këtij peticioni, derisa administrata i ka thënë se ka shkuar në qeveri për një mendim.
Ajo uron që ndjenja e brendshme për Mitrovicën e bashkuar të mos jetë eufori.
Qeveria e Kosovës është pyëtur ndërkohë nëse peticioni është në qeveri për një mendim, por kanë thënë se kjo çështje i takon vetëm Kuvendit, raporton KTV.
Kreu i Mitrovicës, Agim Bahtiri, është shprehur i sigurtë që Mitrovica do të bashkohet brenda këtij viti.
Ai ka qenë edhe më i ashpër në deklarimet e fundit, duke thënë se, nëse preket Mitrovica, do të ketë luftë.
Për bashkimin e këtij qyteti, kryetari Bahtiri gëzon mbështetjen e presidentit Hashim Thaçi dhe të kryeparlamentarit Kadri Veseli.
Discussion about this post