Biznesmeni Petrit Çela është dhunuar fizikisht dhe ndodhet në një spital privat në Tiranë jashtë rrezikut për jetën. Burime për Fax News e kanë konfirmuar ngjarjen ndërsa janë mësuar edhe detaje rretha saj pasi biznesmeni nga Elbasani është dhunuar fizikisht 3 ditë më parë në tregun e qytetit por që nuk është raportuar.
Çela është pronar i tregut ushqimor dhe është dhunuar me sende të forta pas një sherri dhe përplasjeje fizike me një tregtar i cili e ka goditur me një levë në kokë. Pas dhunimit të biznesmenit, rojet e tregut kanë sulmuar tregtarin ndërsa nuk dihet gjendja e këtij të fundit si dhe ku ndodhet. Të njëjtat burime pohojnë se sherri ka ndodhurpër shkak të një parking makine.
Petrit Çela është babai i Suel Çelës, i cili është shpallur nëntorin e kaluar i pafajshëm për ngjarjen e 18 shtatorit të vitit të kaluar kur një automjet i blinduar tip “Audi” A8, goditi makinën e patrullës së policisë, brenda të cilit ishte ish-zv.drejtori i Policisë, Gjergji Oshafi, që po shoqëronte për verifikim në komisariat një “Range Rover” me vlerë 100 mijë euro.
Gjykata për Krime të Rënda shpall të pafajshëm Suel Çelën dhe dënoi me 6 vite burg Enea Bekteshin dhe 5 vite burg Klement Xhaferrin.
Sipas gjykatës, Prokuroria nuk ka arritur të vërtetojë me prova të qarta përfshirjen e Suel Çelës në ngjarjen në Tregun Agroushqimor në Elbasan. Prova e gjetur në automjetin Audi, cigarja, nuk tregon nëse ka qenë ose jo në momentin e ngjarjes Suel Çela.
