Zëvendës Kryetari i LSI Petrit Vasili ka deklaruar nga konventa zgjedhore për njësinë administrative numër nëntë të Bashkisë së Tiranës se LSI është një parti që i mban premtimet dhe sipas tij: “i miri dallon”.
Kështu ai iu referua zgjedhjeve dhe organizimit, duke u përpjekur të bëjë dallimin mes LSI dhe partive të tjera.
“Nuk është mosmbajtja e fjalës dimensioni ynë dhe kjo na dallon. Ua them këtë gjë sepse populli ka një shprehje të thjeshtë ‘i miri dallon’”,- tha z. Vasili.
“Një parti e cila nuk ka të shkuar nuk mund të ketë të ardhme. LSI-ja ka historinë e saj dhe historinë e bëjnë njerëzit. Dhe kur njerëzit janë aty, historia është e gjallë dhe është një histori që zhvillohet”-shtoi Vasili.
Të pranishëm në këtë aktivitet ishin zëvendëskryetari i LSI-së, z. Petrit Vasili, Sekretari i Përgjithshëm i LSI-së, z. Endrit Braimllari, Nënkryetarja e LSI-së, Kejdi Mehmetaj, Kryetarja e LRI-së Floida Kërpaçi, si dhe drejtues të organizatave të partisë për këtë njësi. (A.H/Shuplaka.com)
