Deputeti i Partisë Socialiste, Petro Koçi, ka shprehur kundërshtimin e tij ndaj listave të hapura në nivel rajonal, duke i cilësuar ato si një rrezik për politikën dhe shoqërinë.
Koçi e ka vlerësuar këtë sistem si një kthim të zgjedhjeve në një model që i ngjan zgjedhjeve vendore, duke përmendur se kjo mund të krijojë hapësira për manipulime dhe krim të organizuar.
Ai është shprehur se listat e hapura në nivel rajonal do të jenë një “varr moral” për politikën shqiptare dhe ka theksuar se nëse ky sistem do të mbetet, ai duhet të aplikohet vetëm në nivel kombëtar, duke i dhënë mundësi zgjedhësve të votojnë për më shumë se një individ. Koçi ka shtuar se ky model mund të sjellë pasoja të rënda, duke hapur mundësinë e infiltrimit të grupeve kriminale në politikë.
Deputeti i PS, Petro Koçi: Ti je Sali Berisha, prapa të vjen ligësia. Ti mund të falësh vetëm pasi je hakmarrë, qoftë brenda partisë, qoftë jashtë partisë. Dy fjalë tani për sistemin zgjedhor. Kam qenë kundër listës së hapur në nivel rajonal. Kjo i kthen zgjedhjet në zgjedhje vendore, në zgjedhje kryepleqsh. Lista e hapur në nivel rajonal do kthehet në varrin moral të politikës. Nuk duhet ta kishit bërë. Nëse do lihen listat e hapura, të lihet me opsion kombëtar dhe zgjedhësi të votojë më shumë se një individ. Kjo mënyrë siç është do i hapë rrugë krimit të organizuar.
Discussion about this post