Katër dekanë të Universitetit të Tiranës kanë dalë sot në një konferencë për shtyp ku e kanë cilësuar si shumë të drejtë, por dhe të vonuar vendimin e ministres së Arsimit, Besa Shahini për pezullimin e rektorit Mynyr Koni nga ky post.
Dhori Kule e ka cilësuar vendimin e ministres si ligjor dhe kushtetues si dhe një zgjidhje e vonuar e situatës. “Ndërhyrjet politike e kanë vonuar situatën. Ministrja e re e Arsimit arriti të marrë një vendim eficent dhe kam bindjen se këtej e tutje do te kemi ecuri pozitive“, tha dekani Kule.
Dekani i fakultetit të Drejtësisë Artan Hoxha gjithashtu e ka konsideruar largimin e Konit si një ndihmë ndaj Universitetit të Tiranës
“Ky vendim nuk e shkel autonomine universitare. Rektori ka marre kompetenca te administratorit
duke nënshkruar kontrata financiare, ku ai nuk ka asnje kompentencë“, tha Hoxha.
Rektori Mynyr Koni u pezullua nga ministrja Shahini me një vendim të datës 12 prill 2019 pas disa replikave në distancë kryesiisht me kryeministrin Rama. Koni reagoi publikisht pas marrjes së këtij vendimi.
Në deklaratën e përbashkët për shtyp ishin dhe Prof. Dr Edmond Rapti, dekan Fakulteti i Shkencave Sociale si dhe Prof. Dr Artan Sula, dekan i Fakultetit të Gjuhëve të Huaja.
