Pezullohet nga detyra kreu i Burgut në Tropojë, Granit Kurmekaj, pas akuzave për përfshirje në fushatë

Është pezulluar nga detyra, drejtori i Burgut në Tropojë, Granit Kurmekaj. Ministria e Drejtësisë, me në krye Gazment Bardhin,  ka pezulluar përkohësisht nga posti Kurmekajn, i cili më pas është kallëzuar në polici.

Shkak për këtë pezullim nga detyra mësohet të jetë bërë përfshirja e tij në fushata zgjedhore.

“Pezullohet dhe kallëzohet në Prokurori drejtori i IEVP Tropojë, Granit Kurmekaj. Ai u pezullua në Prokurori për përfshirje në fushatë. Kemi  video dhe informacione ku Kurmekaj përfshihet në fushatë.”, është shprehur ndër të tjera ministria e Drejtësisë në deklaratën e saj.

Njoftimi i ministrisë së Drejtësisë:

Pezullohet dhe kallëzohet në Prokurori Drejtori i IEVP Tropojë, për përfshirje në fushatë zgjedhore

TOLERANCË ZERO PËR ÇDO ANGAZHIM POLITIK NË KUNDËRSHTIM ME LIGJIN NGA PUNONJËSIT E ADMINISTRATËS SHTETËRORE

Ministri i Drejtësisë z. Gazment Bardhi, pezulloi sot nga detyra Drejtorin e IEVP në Tropojë, Granit Kurmekaj, si dhe ia referoi rastin e tij Prokurorisë së Përgjithshme, për veprën penale të përfshirjes në fushatën zgjedhore të një subjekti zgjedhor.

Kjo masë, erdhi pas verifikimit të kryer, si dhe informacioneve të marra nëpërmjet fotove dhe videove, ku konstatohet përfshirja e Kurmekaj, në fushatën zgjedhore në kundërshtim me ligjin.

Për këtë qëllim, Ministri i Drejtësisë i ka referuar çështjen organeve të prokurorisë, si dhe ka vënë në dijeni Zyrën e Prokurorit të Përgjithshëm, për shkak se ekziston dyshimi i arsyeshëm i bazuar në prova, se shtetasi Granit Kurmekaj, me detyrë Drejtor i IEVP Tropojë, ka kryer veprën penale të parashikuara nga neni 328/a të Kodit Penal.

Deri në sqarimin e rrethanave mbi këtë çështje, Ministri i Drejtësisë ka urdhëruar menjëherë pezullimin e përkohshëm nga detyra të Drejtorit të IEVP Tropojë.

Ministria e Drejtësisë inkurajon çdo qytetar që të denoncojë në portalin elektronik në faqen zyrtare të Ministrisë së Drejtësisë, të gjitha rastet e përfshirjes në fushatë apo përdorimit të funksionit publik në favor të një subjekti zgjedhor, si dhe garanton qytetarët jo vetëm për ruajtjen e anonimatit, por edhe për ndjekjen me seriozitet maksimal të këtyre rasteve.

1. Bardhi siguron se është i vendosur në zbatimin e ligjit dhe do të veprojë me tolerancë zero për çdo angazhim politik në kundërshtim me ligjin të punonjësve të administratës shtetërore në varësi të Ministrisë së Drejtësisë.

(XH.A/SHUPLAKA)