Pas dëgjesës së sotme të kryeministrit Edi Rama me qytetarët e Vlorës, analisti Fatos Lubonja, i ftuar në rubrikën “Opinion” në “News 24”, është shprehur se këto dëgjesa pas fitores janë thjesht një “show” i Ramës.
“Në vend që të diskutojë me ekspertë e specialistë situatën dhe mënyrat si do të veprojë për ta zgjidhur atë, ai po bën show sikur është në fushatë. Kjo është mënyra si e kupton ai politikën. Ana tjetër e medaljes, është ky popull. Sepse ky popull këtë feste do. Zihen aty se kush do marrë mikrofonin.
Kjo lloj qeverisje direkt me popullin siç mund të kuptohet nuk është demokratike, dhe është antiinstitucionale. Janë institucionet ato që janë më afër qytetarit. Ky është një lider madhështie që identifikohet me njeriun e pagabueshëm, apo edhe populli mendon se është i pagabueshëm. Padyshim që ankesa ka, por nuk mund të veprohet kështu, apo të zgjidhen kështu. Ankesat e qytetarëve duhet të filtrohen në institucione. Mënyra që po ndiqet është komplet populiste, e shëmtuar si imitim”, tha Lubonja.
Sakaq analisti ka komentuar edhe faktin se Rama ka cituar vargjet e Çajupit: “Burrat nën hije lozin kuvendojnë, pika që nuk iu bie se nga gratë rrojnë”.
Edhe këtë Lubonja e cilëson si një tjetër “show” të kryeministrit. Ai e komenton me fjalët: “Ky thotë pika që s’iu bie se nga gratë rrojnë, këtij i duhet thënë pika që s’të bie se nga budallenjtë rron”. (D.D/Shuplaka)
