Gerard Pique prej disa ditësh është vendosur në qendër të polemikave në Spanjë, për shkak të deklaratave të tij për zhvillimet në Katalonjë.
Ai doli në konferencë për shtyp ditën e mërkurë, ku foli për 35 minuta mbi situatën në Katalonjë dhe shumë pak për futbollin.
Por, në momentin që u pyet nëse ndeshja e radhës ndaj Shqipërisë do të ishte e vështirë, mbrojtësi i Barcelonës shpërtheu në të qeshura. Edhe pse u duk se Pique po qeshte me pyetjen, nuk ka ndodhur pikërisht kështu, në momentin që ai ishte në konferencë dikush, me gjasa nga teknikët, kalon përpara tij duke prishur edhe pamjen.
“Shqipëria, e vështirë apo jo?”, pyeti një nga gazetarët spanjollë dhe Pique nisi të qeshte përpara se të përgjigjej kështu:
“Shqipëria është një skuadër që… (qesh përsëri) isha përgatitur për pyetje tjetër… Është një skuadër e vështirë, e tregoi veten duke u kualifikuar në Europianin e fundit. Në Shqipëri e patëm të vështirë, mbyllen mirë dhe godasin në kundërsulm”, tha Pique pasi arriti të rikthente seriozitetin.
Ndeshja Spanjë-Shqipëri do të luhet të premten në orën 20:45.
(E.K/SHUPLAKA)
