”Ping-Pong” me gazetarin e ”ABC News”, Rama i qejfmbetur për shtëpinë në Surrel: E treguat si të Drakulës (PËRPLASJA)

”Ping-Pong” mes kryeministrit Edi Rama dhe gazetarit Indrit Maraku të ”ABC News”. 

Rama, i qejfmbetur me mënyrën si ky televizion e ka paraqitur shtëpinë e tij në Surrel, i mban leksion gazetarit duke i thënë edhe se çfarë gazetarie duhet të bëjë.

DEBATI I PLOTË:

RAMA: Shtëpia ime është për mua dhe miqtë e mi, ju nuk jeni miqtë e mi! Ajo që keni bërë është negative, e qëllimshme dhe për të manipuluar opinionin publik. Unë nuk kam dashur kurrë t’i hyj këtij debati.

Po ta përsëris prapë, shtëpia ime është shumë më modeste se shumë nga ata që bëjnë opinionistin në Shqipëri. Po ka mur të gjatë se unë jam i gjatë.

GAZETARI: Humbët dy miq, Blushi, Kokëdhima…

RAMA: Së pari mund t’ju them se as njërin as tjetrin nuk i kam bërë miq si anëtar partie, i kam patur miq si individ. Miqësitë e mia nuk më ndikojnë në moskryerjen e detyrës sime. Dhe miq apo jomiq unë nuk bëj dallime në momentin kur cënohet PS, kur cënohet puna jonë e përbashkët.

Dhe sa i përket keqardhjes kur hyn në këtë punë ke keqardhje për shumë gjëra, është pjesë e punës, unë i kam marrë parasysh.

GAZETARI: Lojrat e fatit…

RAMA: Ju bëni akuzat tuaja…

GAZETARI: Unë bëra pyetjet… Doni t’ua kujtoj akuzat e opozitës: ju keni ndryshuar qëndrim se keni interesin tuaj.

RAMA: Po mirë kush është detyra juaj të më pyesni mua a është e vërtetë. Detyra juaj nuk është t’u tregoni shqiptarëve në mënyrë të deformuar shtëpinë time. Po ku është e vërteta në këtë mes? Ku është gazetaria në këtë mes?

Që ta mbyll edhe atë të shtëpisë? Ku ishte pyetja ime për shtëpinë? Mund të më kishit pyetur edhe mua, nuk ishte nevoja të tregonit shtëpinë sikur të ishte e Drakulës. Unë e neveris këtë të gazetarisë ping-pong, ai mendon kështu, po ti ça mendon. Njerëzit çfarë duhet të besojnë? Njerëzit nuk kanë ndërmjetësa, nuk kanë persona që nuk i referohen fakteve. Shikoni opinionistë që janë parti politike. Nuk jam unë kontrollori i lojrave të fatit.

GAZETARI: Unë doja ta saktësoja, se unë jam ai që ju pyes, në redaksi ka të tjerë…

RAMA: Jo juve ju japin pyetjet…Kush është puna ime? Nëse unë do t’i përgjigjesha gjithë akuzave që bën opozita, unë duhet të mbyllja zyrën se nuk do zgjidhja asgjë për shkak se nuk ka një treg që thotë se kush ka të drejtë. I takon akuzuesit të provojë akuzën. (V.G/SHUPLAKA)