Industria ushtarake vendase, pajisja me teknologji dhe sisteme me përdorim të dyfishtë, civil dhe ushtarak, si dhe trajnimi i efektivëve shqiptarë për përdorimin e tyre, janë tre shtyllat kryesore të modernizimit të Forcave të Armatosura.
Ministri i Mbrojtjes, Pirro Vengu, është shprehur pas pjesëmarrjes në Panairin Ndërkombëtar të Aeronautikës “Paris Air Show”, një nga eventet më prestigjioze në botë për inovacionin në industrinë e mbrojtjes dhe aviacionit.
Në një postim në Facebook, Vengu tregon se gjatë vizitës në këtë panair, ka pasur mundësinë të njihet nga afër me risitë teknologjike që ofrojnë disa nga kompanitë më të mëdha dhe të avancuara në botë në fushën e mbrojtjes, ndër to: Anduril Systems, Thales Group, Airbus, MBDA, EDGE Group, KNDS, Saab AB, Safran,
“Modernizimi i Forcave të Armatosura nuk mund të kuptohet pa integrimin e teknologjive me përdorim të dyfishtë. Këto sisteme jo vetëm që rrisin kapacitetin mbrojtës, por shërbejnë edhe për reagim në raste emergjencash civile dhe situata të jashtëzakonshme,” shkruan Vengu.
Pjesëmarrja në “Paris Air Show” është pjesë e një axhende më të gjerë të qeverisë shqiptare për të rritur bashkëpunimin strategjik me kompani dhe shtete partnere në kuadër të forcimit të sigurisë kombëtare dhe rajonale, në përputhje me angazhimet në NATO dhe BE.
Në këtë kontekst, Shqipëria synon jo vetëm pajisjen e ushtrisë me mjete moderne, por edhe ndërtimin e një industrie të qëndrueshme ushtarake brenda vendit, që mund të kontribuojë në sigurinë rajonale dhe në ekonominë kombëtare.
